KALIBO, Aklan—Maga-umpisa eon ro gun ban para sa Barangay ag Sangguniang Kabataan Elections sa Agosto 28 ag magatapos sa Nobyembre 29, 2023.
Suno kay Commission on Elections ukon Comelec Aklan spokesperson Crispin Raymund Gerardo nga raya hay nagakahueugan nga suspindido ro tanan nga registration it mga lisensiyadong baril ag Permit To Carry Outside Residence, mag-eowas kon makabo-oe it exception halin sa komisyon.
Raya hay nakabaehag sigon sa COMELEC Resolution No. 10918 nga nagabawae sa pagbitbit sa guwa it baeay it mga baril ukon makamaeatay nga hinganiban.
Bangud kara, eauman man sigon ro pirmeng pagpatigayon it mga checkpoints eabi eon sa pag-umpisa it election period.
Nakapatigayon eon man suno kana sanda it Provincial Joint Security Control Center kun sa siin gintalakay ro security preparations ag iba pang mga plano para sa eleksyon.
Sa pihak nga parte, gindugang pa ni Gerardo nga iga-finalize nanda ro listahan ag assignments it mga manugturo nga nagpahayag it interes nga magaserbi sa eleksyon pagkatapos it filing it certificate of candidacy ukon COC.
