Kalibo Aklan —–Nagahimas eon it maeamig nga rehas sa Malay Police Station ag posibleng magpangatubang it kaso ro sangka eaeaki matapos rayang mag-post sa social media nga magatao imaw it padya sa sin-o mang makapatay kay Pangueong Rodrigo Duterte.
Suno sa facebook post it suspek nga nakilaea kay Ronald Quiboyen, 40 anyos, tubong Zamboanga Sibugay ag presenteng naga-istar sa Isla it Boracay nga pagataw-an kara it kapin sa 100 milyon pesos nga padya ro makapatay sa pangueo.
Si Quiboyen hay naaresto pinaagi sa gintingub nga pwersa it Malay PNP ag Criminal Investigation and Detention Group ukon CIDG-Aklan matapos nga magkasa it operasyon ro mga operatiba sa Isla kontra sa suspek.
Pangaywa eon si Quiboyen sa mga naaresto it mga otoridad nga nagpost it kapareho nga butang kontra sa pangueo kasunod it 25-anyos nga secondary teacher sa Zambales nga si Ronnel Mas matapos man rayang magpost sa anang twitter account nga pagataw-an kara it padya nga 50 milyon pesos ro sin-o mang makapatay kay Pangueong Duterte ko Mayo 5.
Napa-euha man raya kat arestuhon ag medyu ginhinoesuean ro anang ginhimo.
Posibleng magapangatubang imaw sa kasong Inciting to sedition in relation to anti-cyber crime law.
