Nagpasugot eon sigon ro Hamas sa sangka makasaysayang kasugtanan nga nagatuyo nga eubusan nga bungkagon ro andang mga armas sa Gaza, sa idaeum it planong ginpangunahan ni US President Donald Trump.
Base sa report, kaparte it kasugtanan ro amat-amat nga pag-atras it mga puwersang Israeli halin sa Gaza samtang ginapatigayon ro disarmament.
Kaibahan man sa plano ro pagbilog it sangka bag-ong gobyernong Palestinian ag ro pagbutang it international stabilization force nga magabulig sa pagpabilin it seguridad sa lugar.
Gintawag ni Trump ro kasugtanan bilang sangka “historic agreement” nga magatau it daean sa kalinong ag rekonstruksiyon it Gaza.
Samtang, ginkumpirma it Hamas nga haum sanda nga magtau it konsesyon para sa kamaeayran it mga pumueuyu agud nga matapos eon ro paeatyan ag sapilitang pagpalayas.
Sa pihak kara, nagapabilin nga hangkat ro pagpatuman it kasugtanan eabi eon ag may pilang opisyal it Israel nga nagpahayag it owa pagkakuntento sa mga kondisyon.
Ro nasambit nga kasugtanan hay nakikita bilang importanteng tikang paagto sa kalinong sa Middle East, apang nagapabilin nga magulo ro daean paagto sa eubus nga Gaza.
