Naiproklama eon it Commission on Elections nga nagapungko bilang National Board of Canvassers ro 12 nga senador nga nagdaog sa nagtaliwan nga May 9, 2022 National ag Local Elections.
Base sa NBOC Resolution No. 002-22, ginproklama eon sanday Senators-elect Robin Padilla, Loren Legarda, Raffy Tulfo, Sherwin Gatchalian, Francis ‘Chiz’ Escudero, Mark Villar, Alan Peter Cayetano, Juan Miguel Zubiri, Joel Villanueva, JV Ejercito, Risa Hontiveros ag Jinggoy Estrada.
Haeos tanan hay dati eon nga una sa gobyerno.
May pila nga naging kontrobersiyal pa.
Ro nasambit nga proklamasyon hay makabig nga umpisa eon it panibag-ong administrasyon.
Posibleng mas makolor apang bukon eon it kapareho kasangag dati bangud nga mataeupangdan nga haeos magka-alyado eon ro mga una sa pwesto.
Sa makarondaya nga sitwasyon, nagaeaum kita nga magpabilin sa gihapon ro check and balance sa tanan nga ahensiya.
Kun may dapat nga puna-on, obrahon eon .
Kun may nakikitang pageabag, imbestigahan, ag kasuhan.
Indi pagkalipatan ro ginsumpaan nga obligasyon ag ro mga ginpromisa ko tiempo it kampanya.
Nasayuran naton ro importansiya it pagkaeasugot sa gobyerno paagto sa pag-umwad apang dapat man nga bantayan engkaso may nagakaeasugot sa nagakatabu nga korapsyon.
Sa uman, nagaeaum kita sa atong mga nagdaog nga senador nga mas mapabakod ro Kongreso, mas maabung ginaproponer nga laye ro madihon para sa kamaeayran it nasyon ag mas pang mapaeapad ro serbisyo-publiko.
