KALIBO, Aklan – – – Hugot nga seguridad ro iga patuman para sa Opening Salvo it Kalibo Sto. Nino Ati-Atihan Festival 2018 sa Okubre 19, 2017.
Sa gina eauman, uman nga magasangag sa tunog it tamboe ro banwa it Kalibo bangud sa ‘Tamboe Salvo’ kun sa siin magapatigayun man it pagsinadya pinaagi sa pagsadsad.
Suno kay KASAFI Public Information Officer Boy Ryan Zabal nga kapin sa 46 ka mga tribu ag grupo ro kumpirmadong magapasakop sa daywang adlaw nga kasadyahan.
Ro Ati-Atihan opening salvo hay sangka sneak preview it sambilog sa world’s Top 300 best festivals bilang pagpasundayag kay Senor Santo Nino.
Gin hayag man ni Zabal nga nakaangkon eon sanda it koordinasyon sa Kalibo PNP Station ag Aklan Provincial Police Office (APPO) nga imaw ro maga panguna it pagsekyar it seguridad sa nasambitan nga kahiwatan.
Haum man sigon ro linyada it MDRRMO-Kalibo bilang sambilog sa mga first responders engkaso nga makaangkon it emerhensiya.
Gin padumdum man ni Zabal nga hugot nga iga patuman ro maidid nga pagpatigayun it pagchekyar sa mga magasueod sa festival zone kapareho it pagrekisa sa andang mga back packs, pagbawae it pagbitbit it mga de boteng ilimnon kamana man it pagbawae it pagbitbit it makamaeatay nga hinganiban kamana man nga makaangkon it signal jamming.
Nagpangayu man raya it pasaylu sa mga motorista bangud sa pagsarado sa naga pangunang kalye partikular eon sa pag umpisa it pagsadsad sa alas-2:00 it hapon sa Oktubre 19 maghalin sa Magsaysay Park paagto sa Kalibo Pastrana Par.
Ro Ati-Atihan festival nga gin bansagan bilang “Mother of All Philippine Festivals” hay iga patigayun maghalin sa January 12-21, 2018.
Sa makaron hay maabong mga aktibidades ro nakalinyada nga gina eakipan it bag-o ag luma nga gina panan-aw nga dugang nga makatao it kolor sa selebrasyon it kapiestahan ni Senor Santo Nino sa banwa it Kalibo.
