KALIBO, Aklan — Ginalaygay ni Sangguniang Bayan member Raymar Rebaldo nga unahon nga limpyuhan ro mga traffic obstructions sa mga karsahon kapareho it mga nakaparadang saeakyan antes nga tun-an ro pagbutang it pedestrian overpass sa nasambit nga lugar bilang alternatibong solusyon sa gutok nga daeagan it trapiko eabi eon ro paagto sa direksyon it Banga.
Suno kana nga sangka resolusyon ro anang gindihon may tatlong domingo eon ro nagtaliwan nga nagahinyu sa pamunuan it Kalibo Municipal Police Station nga mag-assign it police force agud nga magpatuman it hugut nga kampanya kontra sa mga nagapatigayon it illegal parking sa kahabaon it F. Quimpo St. ag Osmena Avenue Kalibo.
Nagapati sigon imaw nga indi raya masarangan it mga katapo it Kalibo Auxilliary Police bangud kaeabanan nga naga-parking sa lugar hay mga kotse nga ginapanag-iyahan it mga bigatin nga indibidwal.
Dugang pa ni Rebaldo nga mabawasan ro traffic problem sa bilog nga Kalibo partikular sa nasambit nga lugar kon magpatigayon it clearing operations eabi eon ro pagbawae nga obrahon nga parking area ro kilid it mga national highway.
Samtang, mag-eowas sa Kalibo MPS, naghinyu man imaw sa pamunuan it Municipal Local Government Operation Office nga ibalik ro mandu it DILG nga road clearing operations.
