KALIBO, Aklan—Ginklaru ni Ibajay mayor Jose Miguel Miraflores nga magasuspinde eamang it face-to-face classes ro mga eskwelahan sa andang nasakupan ag magasaylo sa modular distance learning kun grabe ro init it paniempo nga naeksperyensiyahan.
Raya hay kasunod it ginpaguwa nga Executive Order no. 11 series of 2024 ukon ro pagdeklara it pagsuspinde it face to face classes halin sa pre-school hasta sa senior high school sa parehong pampubliko ag pribadong eskwelahan bangud sa extreme level it heat index sa nasambit nga banwa umpisa Abril 4 hasta Mayo 31, 2024, mag-eowas eamang kon makaangkon pa it extension ukon mabawi ro mandu.
Suno kay mayor Miraflores nga ro mga eskwelahan ro may otoridad ag responsibilidad nga suspindihon ro in-person classes ag magsaylo sa alternative delivery modes sa tiempo nga grabe ro kainit nga maka-apekto sa pagpatigayon it klase ag mabutang sa peligro ro ikamayad nga eawas ag kamaeayran it mga learners ag mga manugturo.
Dugang pa nga iba-iba ro sitwasyon it mga eskwelahan rason nga ro school heads ro magadesisyon sa kada adlaw kon makaangkon it class suspension.
Ginpahayag pa nga magatau eamnag sanda it impormasyon sa mga school heads angot sa projected heat index sa kada adlaw.
Ginhalimbawa nana nga kon ro heat index hay maga-abot sa 33 degrees celcius pataas hay nakadepende sa mga school heads kon magasaylo sa modular distance learning, apang kon sumaka eon sa 38 degrees celcius hay otomatiko nga suspindido ro klase.
Nauna eon nga nagpaandam ro mga eksperto nga mas pa nga makaeksperyensiya it mainit nga paniempo sa nasyon sa masunod nga mga inadlaw eabi eon sa pagsueod it summer season.
