KALIBO, Aklan — Bangud sa nagapadayun nga intensified campaign it kapulisan kontra sa iligal na droga, medyu nakabatyag eon it kahadlok ro mga pushers ag users sa probinsiya it Aklan.
Suno kay P/Major Frenzy Andrade, hepe it Provincial Drug Enforcement Unit ukon PDEU nga nabatyagan eon it mga drug personalities ro epekto it andang ginpabaskog nga kampanya eabi eon sa tiempo it administrasyon ni Pangueong Rodrigo Duterte.
Kumpiyansa man imaw nga madugangan pa ro mga barangay sa Aklan nga madeklarang drug-cleared.
Sa pihak nga parte, uman nga gin-insister ni Andrade nga owa sanda nagatanum it iligal nga droga sa mga ginapatigayon nanda nga buy-bust operation.
Gindugang pa nana nga ro andang operasyon hay para sa kamaeayran it tanan eabi eon it mga pamatan-on nga mailikaw sa pagka-adik sa iligal nga droga.
Nasayuran nga sangka dating nagaduso it droga nga si Joseph Ticar , alyas Otip, 34, ag residente it General Luna St. Kalibo ro uman nga nadakpan sa buy-bust operation sa Brgy. Bulwang, Numancia, aga-aga it Huwebes.
Balik-kulungan raya matapos nga pasakaan it kasong pag-eabag sa Republic Act 9165 ukon Comprehensive Dangerous Drugs Act of 2002.
Si Ticar hay gin aresto it mga otoridad matapos nga mabakean it daywa ka mga sachet it suspected shabu kabaylo it P5,000 nga buy-bust money.
Nasayuran nga ro suspek hay may dati man nga kaso angot sa droga ag naka guwa pinaagi sa plea bargaining apang uman nga nagbalik sa dating bisyo.
