Nagbutang ro Iran it sangka mabahoe nga billboard sa tunga nga parte it Tehran nga may sueod nga mensaheng “We Will Kill Trump” sa English ag Persian, kadungan it padayun nga naga-grabeng tensyon sa tunga it Iran ag Estados Unidos.
Makita sa billboard ro imahe ni U.S. President Donald Trump nga naka-eubog sa sueod it kabaong, nga nagasimbolo sa sangka prusisyon it eubong.
Nakabaehag man kara ro katagang “In memory of Minab’s children,” nga nagatumod sigon sa mga unga nga namatay sa siyudad it Minab matapos ro gina-alegar nga pag-atake it pwersa it U.S. ko Pebrero.
Nauna kara, samtang ginapatigayon ro tiempo it pagpangasubo para sa namatay nga Supreme Leader it Iran, gin-report nga may mga nagapangasubo nga nagasinggitan it mga panawagang pagbaeos kontra kay Trump.
Kadungan kara, ginkumpirma it U.S. Central Command (CENTCOM) nga nagpatigayon ro Estados Unidos it panibag-ong serye it mga airstrike gamit ro precision munitions kontra sa mga target sa Bandar Abbas ag Greater Tunb Island bilang kaparte it operasyon kara kontra sa Iran.
Samtang, umatras si Trump sa nauna nana nga proposisyon nga magpapanaog it 20 porsiyentong bayad sa mga barkong naga-agi sa Strait of Hormuz matapos sigon nga makabaton it pag-oponer halin sa mga kaalyadong nasyon ag mga opisyal nga nagpaandam sa posibleng epekto kara sa diplomasya ag pangkalibutanon nga presyo it enerhiya.
Padayun man nga ginabantayan it mga awtoridad it Estados Unidos ro mga paeag sa seguridad samtang nagapabilin nga mataas ro tensyon sa Middle East.
