KALIBO, Aklan—Uman nga gindumdum it mga igbata ag lokal nga opisyal it Aklan ro kabaganihan nga hinimuan it 19 Martyrs it probinsiya it Aklan nga naghaead it andang mga kabuhi agud nga masuk-ean ro pagpamigos it mga kastila.
Angot kara, pilang aktibidad ro ginpatigayon sa Aklan Freedom Shrine para sa komemorasyon it ika-126 nga death anniversary it nasambit nga mga baganihan makaron nga adlaw it Huwebes, Marso 23.
Kaibahan sa mga aktibidad sa event hay ro misa, pagpasidungog sa militar, paghaead it bueak, pag-alsa it bandera it Pilipinas nga ginpangunahan nanday P/Lt. Alvin Balio ag Fire Sr. Inspector Arden Bedonia it Bureau of Fire Protection ukon BFP-Kalibo.
Kadungan kara, gin engganyo ni Kalibo mayor Juris Sucro ro tanan nga mga Aklanon eabi eon ro mga pamatan-on nga ibutang sa isip ag tagipusuon ro legasiya ag tuearon ro kabaganihan it 19 marteres it Aklan.
Ro nasambit sigon nga mga baganihan hay may mabahoe nga kontribusyon nga nagaserbing reminder sa tanan nga makaangkon it kahadlok sa Diyos ag pagpalangga sa nasyon ag pagserbisyo sa probinsiya.
Sa pihak nga parte, ginpahayag man ni governor Joen Miraflores nga ro kamatayon it nasambit nga mga freedom fighters hay naging daean sa pag angkon it kahilwayan it mga Akeanon.
Ro 19 Martyrs it Aklan hay ginpatay ko March 23, 1897.
Raya hay sanday Roman Aguirre, Tomas Briones, Domingo dela Cruz, Valeriano Dalida, Claro Delgado, Angelo Fernandez, Benito Iban, Candido Iban, Simon Inocencio, Isidoro Jimenez, Catalino Mangat, Lamberto Mangat, Valeriano Masinda, Maximo Mationg, Simplicio Reyes, Canuto Segovia, Gabino Sucgang, Francisco Villorente, ag Gabino Yonsal.
Ro Marso 23 it kada dag-on hay ginakabig nga special public holiday sa Aklan pinaagi sa gahum it Republic Act 7806.
