Gina-istoryahan it mga Indian netizens ko kan-o eamang ro kabayo nga ginsakay sa sangka puno nga commuter train sa India!//Unang nag-viral ro litrato it sangka kabayo nga napalibutan it mga pasahero it sangka local train sa West Bengal, India.
Maabu nga nagduda nga edited eamang litrato ag maskin ro pamunuan it Eastern Railways hay indi makapati nga may kabayo nga nakasakay sa andang train.
Apang, kat sumunod nga mga adlaw, nagkalhit eon sa social media ro mga video nga nagapamtuod nga may ginsakay nga kabayo sa train.
Nabuoe ro litrato ag video sa Sealdah-Diamond Harbour Down.
Suno sa mga pasaherong nakasakay ro kabayo, ginhambaean eon nanda ro tag-ana kara nga indi pag-isakay ro andang alaga bangud nga sobrang gutok eon sa sueod it train apang ginbaliwala eamang sanda.
Nasayuran nga ro kabayo hay kakahalin eamang sa karera ag owa naila ro tag-ana kara nga magaoy ro anang alaga sa pag-uli.
Suno sa tagapaghambae it Eastern Railways, owa sanda it kasayuran sa nasambit nga hitabo ag magalunsar sigon sanda it imbestigasyon kung paano napasugtan nga pasakyon ro kabayo sa pampasaherong local train.
