Nagaabot eon sa kabilugang P113,734,514 ro inisyal nga halit nga gin-aywanan ni Bagyong Paeng sa bilog nga probinsya it Aklan.
Base sa progress report nga ginpaguwa it Aklan Provincial Disaster Risk Reduction Management Council, nakalista eon it pito nga namatay samtang sambilog nga iba pa ro ginausoy maghalin sa banwa it Libacao.
Sa parte it agrikultura hay nagaabot eon sa P49,970,514 ro nailista nga danyos samtang ginatantya nga P63,624,000 ro sa imprastraktura ag P140,000 ro sa public utilities.
Mag-eowas kara, sumaka eon man sa 169 ka mga kabaeayan ro totally damage ag 1,559 ro partially.
Samtang, 70,738 ka pamilya nga ginakaeakipan it 227,926 ka mga indibidwal ro apektado.
Samtang sa pihak nga parte, hugot man ro pagpadumdom sa publiko ni Jeffrey Jismundo it Aklan PDRRMC nga sundon ro regulasyon nga ginapatuman it law enforcement agency sa pagsueod sa sementeryo makaron nga adlaw.
Hugot nga ginadumilian suno kana ro pagdaea it mga hinangiban, baril ag iba.
Bawae man sa sueod it sementeryo ro mga videoke ag eabi sa tanan ro pagsugae maskin hambaeon pa nga kamu eamang sing mga himata ro gahampang.
Mag-eowas kara, kon may mga ginabatyag sa eawas hay ipaiway eon lang anay ro pag-adto sa mga sementeryo para sa kaeowasan it andang ikaayong eawas
