KALIBO, Aklan—Ginapahauman eon it lokal nga gobyerno it Kalibo ro Ati-Atihan opening salvo sa buean it Oktubre.
Suno kay Jay-Ar Arante, head it media team it LGU-Kalibo nga ginaeauman nga ro event hay uman nga pagadagsaon it linibu nga mga turista ag mga pumueuyu kapareho sa nasaksihan ko nagtaliwan nga dag-on.
Posible man suno kana nga bukon eamang raya it sang adlaw nga event kundi abuton it tatlong adlaw.
Ro masadyang ‘sadsad’ sa kalye ro sambilog sa mga gina-abangan sa opening salvo.
Dugang pa ni Arante nga pagaeauman nga daeagkuan nga mga pangaean sa showbiz industry ro paga-imbitahan kapareho it mga artista, singer ag mga banda.
Madumduman nga naging magarbo ro selebrasyon it opening salvo ko nagtaliwan nga dag-on bangud nga mag-eowas sa fireworks display ag street dancing hay nakaangkon man it live performance halin sa mga sikat nga banda ag artista.
Sa pihak nga parte, ginkumpirma man ni Arante nga nakaangkon eon it pueong ro Kalibo Ati-Atihan Festival Board ukon KAFEB ag ro LGU kalibo, apang indi pa sigon matumod makaron ro ensaktong numero it mga magapasakop nga tribu ag grupo para sa street dancing competition.
Ro ginakabig nga “Mother of All Philippine Festivals” hay ginaselebrar bilang pagpasidungog sa kapistahan ni Señor Sto. Niño de Kalibo nga ginapatigayon kada ikatlong domingo it enero it kada dag-on.
