KALIBO, Aklan—Makipagbahin si mayor Juris Sucro kaibahan ro pilang tawuhan it lokal nga gobyerno it Kalibo, Aklan agud sumaksi sa ikaywang civilian mission sa pagpanguna it Atin Ito Coalition sa bahin it West Philippine Sea (WPS) makaron nga adlaw it Miyerkules, Mayo 15, 2024.
Suno kay Carla Doromal, Executive Assistant II to the Office of the Municipal Mayor ng LGU Kalibo, gusto sigon it alkalde nga personal nga maeksperyensyahan ro mga ginapatigayon nga resupply mission ag para makapaabot man it bulig sa kaparehong Pilipino ag sa mga mangingisda sa Bajo de Masinloc.
Manami nga kahigayunan raya para sa alkalde nga masayuran ro hinaing it mga mangingisda nga nagaprotekta sa kaeawran nga pilit ginaangkon it China.
Dugang pa ni Doromal nga ginpahayag ni mayor Sucro nga haom raya nga ibuwis ro anang kabuhi bangud sa mabahoe nga obligasyon kara sa pagdepensa it nasyon ag para igainsister ro kinamatarong it mga pumueoyo sa ginapag-agawan nga teritoryo.
Nasayuran nga si mayor Sucro hay sambilog man nga Philippine Army reservist.
