KALIBO, Aklan—Nag-apela si Kalibo Sangguninag Bayan member Augusto Tolentino sa mga stall owners nga gin-isyuhan it acknowledgement receipt it Kalibo Sr. Sto. Niño Ati-Atihan Management Council, Inc. (Kassamaco) nga magdangop sa konseho.
Tuyo kara nga mausisa ro gin-isyu nga mga resebo bilang dugang nga ebidensiya sa ginahimo nga imbestigasyon it Bureau of Internal Revenue ukon BIR-Aklan.
Nauna eon nga nagpanindugan ro SB nga iligal ro mga gin-isyu nga resebo it Kassamaco eabi eon sa mga stall owners nga nagrenta sa kabilugan nga selebrasyon it kapyestahan ni Sr. Sto. Niño de Kalibo.
Mag-eowas kara, gin-intrahan man sigon nanda ro trabaho it MEEDO-Kalibo sa pag-kolekta it mga stall rentals.
Gindugang pa ni Tolentino nga ginaduso nanda sa Kassamaco nga ibalik ro kwarta nga andang ginkolekta.
Madumduman nga pinaagi sa aprubadong resolusyon it SB-Kalibo hay magapatigayon man it kaugalingon nga imbestigasyon ro BIR angot sa gina-alegar nga pag-isyu kara it mga iligal nga resebo sa mga transaksyon kara sa nagtaliwan nga Ati-atihan festival ko buean it Enero.
Naging kontrobersiyal ro festival organizer matapos nga ma-delay ro andang pag sumite it financial report sa konseho.
