NATIONAL News — Gintapos eon it manaba nga kapueungan it Kongreso ro andang sesyon para sa ika-19 nga Kongreso nga owa gin-ratipikahan ro hagna nga nagatuyo nga pataasan ro minimum nga sweldo it mga trabahador sa pribado nga sektor, nga nagresulta sa kapaseawan nga masumite raya sa Malacañang para sa pirma ni President Ferdinand Marcos Jr.
Ginsuhestyon it Kamara ro dugang nga P200 sa adlawan nga sweldo, samtang katunga eamang kara ro bersyon it Senado.
Owa nagmadinaeag-on ro daywang kapueungan it Kongreso nga magkaeasugot.
Suno kay Senate President Francis “Chiz” Escudero, bukas imaw sa posibilidad nga batunon it Kamara ro hagna nga dugang nga P100 nga sweldo halin sa Senado.
Dugang pa ni Escudero, owa nanda nasayuran ro basehan it P200 nga hagna it Kamara nga ulihi eon nga ginpasa ag ginmadali eon lang makaron nga adlaw.
Nagpanawagan man si Senador Joel Villanueva sa bicameral conference committee it Kamara nga batunon eon ro bersyon it Senado.
Apang suno kay Rep. Fidel Nograles, Chairperson it House Committee on Labor and Employment, mas gusto it Kamara ro bukas ag maid-id nga proseso it bicameral conference, imbes nga mapilitan nga batunon nga kumpleto ro bersyon it Senado nga owa it bastante nga pagtalakay ukon kompromiso.
Bukon it kaibahan ro hagna angot sa dugang sa sweldo sa mga prayoridad it Legislative Executive Development Advisory Council.
Ginpahayag man it Kilusang Mayo Uno nga ro kapaseawan nga maratipikahan ro hagna nga dugang-sweldo hay “unacceptable” ag “unforgivable.”
