KALIBO, Aklan–Ginkwestiyon ni Punong Barangay Jessie Morales it Libas, Banga ro ginpagguwa nga Advisory No. 3 ni Mayor Noel Redison kung siin nakabaehag ro “No movement status” matapos nga mailista ro unang kaso it African Swine Fever (ASF) sa ASU-multiplier farm.
Panindugan ni Kapitan Morales nga bukon it tama ro naging aksyon it alkalde bangud owa raya nagpatigayun it konsultasyon sa andang barangay.
Dapat suno kana antes nagpagguwa it sueondanan hay nag-usisa anay raya sa mga apektadong residente.
Ginapahayag nga haeos 40 porsyento it anang pumueoyo ro hog raisers rason nga maabu ro maapektuhan it naging tikang it lokal nga gobyerno.
Bangud kara, magapatigayun it emergency meeting si Kapitan Morales kaibahan ro barangay council agud nga maistoryahan ro andang concern.
Plano man nana nga personal nga magdangop sa opisina it alkalde agud nga ipaabot ro andang sentimiyento.
Nasayuran nga halin sa limang baboy nga namatay sa nasambit nga farm hay daywa ro nagpositibo sa ASF.
