KALIBO, Aklan—Posibleng matapos eon sa buean it Hulyo it makaron nga dag-on ro construction it kauna-unahan nga pedestrian overpass nga nahamtang sa Mabini ag Desposorio Maagma Sr. Streets, Kalibo.
Suno kay Jay-ar Arante, head it media team it lokal nga gobyerno it Kalibo nga natapos eon ro Phase I it construction it overpass bridge sa magtimbang nga parte.
Sa makaron hay padayun ro pag-contruct sa Phase 2 it proyekto nga ginaeakipan it pagbutang it girders, trusses, ag iba pa agud nga mas pa nga mapabakod ro concrete structures.
Samtang, ginpahayag ni Arante nga mabahoe nga bulig ro overpass sa mga pedestrians eabi eon sa mga inunga nga estudyante it Kalibo Pilot Elementary School, Kalibo Elementary School ag Kalibo Integrated Special Education Center para sa eowas nga pagtabok sa ginakabig nga sambilog sa pinakamasako nga karsada sa Kalibo.
Nasayuran nga agud nga mataw-an it daean ro proyekto, nauna eon nga gin demolish ro “Aloha” structure sa Mabini Street.
