KALIBO, Aklan—Sa baylo nga kaginhawaan ro mabatyagan sa sueod it sang dag-on nga pagpamuno ni Pangueong Ferdinand Marcos Jr., kagutuman ro naeksperyensyahan it kaabuan.
Raya ro naging reaksyon ni Danilo Ramos, national chairperson it Kilusang Magbubukid ng Pilipinas (KMP) sa ikaywang State of the Nation Address ukon SONA it chief executive kon sa siin ginbida nana ro kadiwa stores nga may mabakae nga mga baratong produktong agrikultura.
Suno kay Ramos, limitado eamang ro mabakae sa nasambit nga kadiwa stores ag bukon it tanan sa nasyon hay maserbisyuhan kara.
Ginpahayag dugang nga mas kapin pang nagtaas ro presyo it bugas it daywa hasta tatlong piso kada kilo.
Apang, ro andang ani nga paeay hay ginabarat sa pagbakae.
Mag-eowas kara, naging bueawan man ro presyo it sibuyas ko nagtaliwan nga mga binuean rason nga kapurilan ro ginpahayag it presidente nga nagbarato ro mga nagapangunang baeak-eon.
Samtang sa pihak nga parte, gintawag it andang grupo nga Department of Angkat ro Department of Agriculture nga mismong si pangueong Marcos Jr. ro sekretaryo.
Raya hay matapos ro sunod-sunod nga importasyon it produktong pang agrikultura.
Ginpahayag dugang nga raya ro sambilog sa nagapatay sa mga mangunguma bangud nga ginabaliwala ro lokal nga produksyon rason nga kapurilan nga pabaskugon ro sektor it agrikultura sa nasyon base sa ginsambit it chief executive sa anang SONA 2023.
