SHOWBIZ News — Ginmanduan it Muntinlupa Regional Trial Court Branch 205 ro tanan nga partido sa cyber libel case nga gindihon ni Vic Sotto kontra kay filmmaker Darryl Yap nga indi ibulgar ukon istoryahan ro case proceedings ag iba pang may kaangtanan sa isyu matapos kara nga pasugtan ro urgent motion ni Yap para sa pagpaguwa it gag order nga ginpasaka ko Enero 10.
“The Petitioner and any person acting for and on behalf of the petitioner are enjoined from publicly disclosing or discussing the contents of the verified return to be submitted by the respondents in this case, as well as any matters learned from the proceedings of this case,” nakabaehag sa Omnibus Order nga ginpaguwa ko Lunes, Enero 13.
Suno sa abogado ni Yap nga si Atty. Raymond Fortun, nagdihon sanda it mosyon para pugngan ro kampo ni Sotto nga magpaguwa it iresponsableng pahayag ag malikawan ro pagpaguwa it anumang detalye it pelikula bangud nga owa pa raya naipaguwa.
Nakitaan it korte it merit ro argumento nga ro pagpaguwa it impormasyon hay maka-apekto sa resulta it pelikula.
Ginpasakaan ni Sotto si Yap it 19 counts it cyber libel matapos nga mamitlangan ro anang pangaean sa teaser it pelikulang “The Rapists of Pepsi Paloma”.
Sa Omnibus Order nga ginpaguwa ko Lunes, ginmanduan ni Presiding Judge Liezel Aquiatan si Sotto nga magkomento sa sueod it tatlong adlaw sa motion for consolidation nga ginpasaka ni Fortun.
Tuyo it motion for consolidation nga ilibahon ro petition para sa writ of habeas data ni Sotto kaibahan ro anang criminal complaint suno sa mandato it Supreme Court Circular 08-1-16-SC.
Ginklaru it korte nga owa pa kara ginamandu ro pagbo-oe it mga materyales nga may kaangtanan sa pelikula.
Samtang, ginsaylo ro hearing nga dapat kunta hay Enero 15 hay ginhimo nga Enero 17.
