KALIBO, Aklan—Naga-apela ro lesbian, gay, bisexual, transgender and queer ukon LGBTQI + community sa probinsiya it Aklan nga aprubahan eon ro SOGIE Equality Bill sa manaba ag mataas nga kapueongan it kongreso.
Suno kay Errol Ordines, general manager it Queen of Aklan organization nga haeos 23 anyos eon nga naka-pending ro proposed bill rason nga tiempo eon agud nga raya hay maipasa agud nga eubusan nga maging laye.
Ginpahayag dugang nga kinahang-ean it bag-ong laye bangud nga kueang ro proteksyon sa mga LGBT persons sa mga naga-eksister nga laye sa nasyon.
Owa sigon it anti-discrimination law nga nagabawae ag nagatau it penalidad kon kahikawan it serbisyo ukon ginatabog sa eskwelahan, opisina, mall ag iba pang lugar ro mga LGBT persons bangud eamang sa andang kasarian ag sekswalidad.
Bangud kara, nalimitahan ro andang mga oportunidad nga maka eskwela, makapagtrabaho, ag makapangabuhi it may dignidad.
Samtang, ginpamilit pa kara nga ro ginaduso nga proposed bill hay owa nagakahueugan nga sanda hay nagapa-importante kundi nga gusto eamang nanda nga makaangkon it patas nga pagtrato ag proteksyon.
Sa pihak nga parte, ginpamalibaran man ni Ordines ro pagpati it ibang religious sector nga engkaso nga maaprubahan ro SOGIE bill hay pagapasugtan man ro same-sex marriage sa Pilipinas.
Suno kana nga owa it makarondaya nga provision sa ginaduso nga proposed bill.
