BURUANGA, Aklan—Nakataeana nga magdeklara it state of calamity ro lokal nga gobyerno it Buruanga sa oras nga mabaton ro pinal nga assessment report kon makasueod raya sa kwalipikasyon bangud sa pagpanaeasa it nagtaliwan nga bagyong Kristine.
Suno kay Buruanga mayor Concepcion Labindao, nakalista it daywang totally damage nga panimaeay ag 126 ro partially partikular ro nahamtang sa coastal area.
Mag-eowas kara, nag-aywan man it halit sa agrikultura ag pangabuhian it mga pumueoyo partikular sa mga mangingisda ro bagyong Kristine bangud sa mga nagkaeasamad nga motorbanca it mga fisherfolks.
Ginpahayag dugang ni mayor Labindao nga kapin sa 4,500 families nga ginakaeakipan it 16,248 individuals ro apektado kon sa siin 112 families ro nagbakwit nga ginakomponeran it 388 individuals.
Sa pihak nga parte, ginkasubo man it alkalde ro eubusan nga pagkamasad ko atop it andang covered court bangud sa mabaskog nga hangin nga nauna eon nga nakaangkon it kasamaran sa pagpanaeasa it mga naunang bagyo.
Sa makaron suno pa sa alkalde hay nagapadayon ro mga pabugso-bugsong uean ag hangin apang uwa it nailistang landslides mag-eowas eon lang sa mga punong kahoy nga nagkaeatumba.
