KALIBO, Aklan—Gin-umpisahan eon it lokal nga gobyerno it Kalibo ro pagpanupod it financial assistance sa 42 nga mga hog raisers nga naapektuhan it African Swine Fever ukon ASF.
Suno kay Kalibo municipal agriculturist Uriel Las Piñas nga ro pondo hay halin sa provincial government it Aklan pinaagi sa provincial veterinary office.
Raya sigon ro unang batch it distribution matapos ro maid-id nga validation it provincial veterinarian para sa cash assistance.
Gindugang pa ni Las Piñas nga ginatinguhaan nanda nga mataw-an it bulig pinansiyal ro tanan nga mga apektadong hog raisers kun sa siin ro andang taeatapan ro nagapanguna sa pagproseso it mga nagakaigo nga dokumento ag kinahangeanon nga validation agud nga ma-avail ro financial assistance nga naga-abot sa P5,000 pesos hasta P3,000 pesos sa kada hog raiser nga nakadepende sa gin-assess ag gin-validate nga numero it apektadong baboy.
Apang ro gin prayoridad sigon nanda hay ro mga hog raisers nga nagpasugot nga ipa-culled ro andang mga alaga ukon nag-report sa pagkamatay it andang mga baboy bangud sa ASF infections.
Ro mga recipient it cash assistance hay naghalin sa nagkaeain-eain nga barangay it Kalibo, kun sa siin naging priority nanda ro Caano ag Pook.
Samtang, posibleng magatau man ro LGU Kalibo it bulig pinansiyal sa mga owa nakabaton it ayuda agud nga mataw-an it ayuda ro tanan.
Mag-eowas sa livelihood assistance, nakataeanang magatau man it livelihood assistance ro Department of Social Welfare and Development ukon DSWD.
