INTERNATIONAL News — Linibo nga mga raliyista ro naglunsar it protesta sa Washington ag iba pa nga mga siyudad sa Amerika agud nga kontrahon ro mga polisiya ni US President Donald Trump angot sa deportation, pagpahalin sa mga empleyado it gobyerno, ag ro giyera sa Gaza ag Ukraine.
Makita sa guwa it White House ro mga nagprotesta nga nagadaea it mga bandera nga nagahambae nga “Workers should have the power,” “No kingship,” “Stop arming Israel” ag “due process”.
Samtang, ro iba pa nga mga demonstrador hay nagasinggitan it andang suporta sa mga migrante nga gin-deport ag nagaplano nga i-deport it administrasyon ni Trump.
May mga nagwagayway man it mga bandera it Palestine samtang nagasuksok it keffiyeh scarves ag nagasinggitan it “free Palestine” ag nagpakita it paghiliusa sa mga Palestinian nga napatay sa giyera it Israel sa Gaza.
Pila pa nga mga protesters ro nagpakita man it andang suporta sa Ukraine ag naghinyo sa Washington nga indi magmadali sa paghimo it mga desisyon angot sa nagapadayon nga inaway sa tunga it Ukraine ag Russia.
Samtang, ginlunsar man ro mass rally sa New York City ag Chicago ag iba pa nga lugar sa Amerika.
Raya eon ro ikaywa nga adlaw it nationwide demonstrations nga ginlunsar matapos magpungko bilang presidente si Donald Trump
