KALIBO, Aklan—Ginpaabot it Commission on Elections ukon Comelec-Aklan nga nakataeanang igapaguwa ro unang listahan it mga kandidato sa probinsiya para sa midterm elections sa masunod nga dag-on.
Raya hay matapos nga owa it naging kwestiyon sa andang mga ginsumite nga mga hard ag soft copies it mga certificate of candidacy ukon COC ag iba pang dokumento sa eleksyon sa legal department it main office it komisyon.
Angot kara, gin engganyo ni Comelec Aklan spokesperson Chrispin Raymund Gerardo ro mga kandidato nga sa oras nga mag-abot ro listahan hay i-double check ro andang mga pangaean nga makita ukon maga-appear sa mga balota.
Tuyo kara nga magiging ensakto ro pangaean ag numero it mga kandidato sa andang igapadaea nga ikaywa ag pinal nga listahan.
Samtang, ginklaru pa nana nga ro tanan nga mga nagdihon it kandidatura hay puro aspirante pa eamang ag pagakabigon nga official candidate sa pag-umpisa it campaign period ukon 90 days antes ro eleksyon para sa nasyunal ag 45 days para sa mga local candidates.
