Posibleng gamiton it Philippine National Police (PNP) ro pagtambong ni Senador Ronald dela Rosa sa mga sesyon it Senado pinaagi sa video conferencing agud masayuran ro anang lokasyon kon maaprubahan ro ginaduso nga pag-amyenda sa Senate rule.
Ko kan-o eamang, nangin sentro it paghinun-anon sa Senado ro proposal nga pasugtan ro mga senador nga makatambong ag makaboto sa mga sesyon pinaagi sa teleconferencing.
Ginkwestyon it minority bloc ro proposal bangud nga pwede raya nga gamiton it mga senador nga nagapangatubang it kaso, imbestigasyon, ukon arrest warrants, partikular eon si dela Rosa.
Suno kay PNP Public Information Office chief P/Col. Allen Rae Co, pagatinguhaan it kapulisan nga masayuran ro lokasyon ni dela Rosa gamit ro anuman nga online link ukon platform nga ginagamit sa video conferencing.
Si Dela Rosa hay nagapangatubang it reklamo para sa mga crimes against humanity nga may kaangtanan sa war on drugs it administrasyon ni dating Presidente Rodrigo Duterte sa atubang it International Criminal Court.
Ginsambit man sa diskusyon it Senado si Senador Bong Go, nga ginkilaea nga co-perpetrator sa reklamo it ICC, kaibahan ro iba pa nga mga senador nga nagapangatubang man it reklamo ag imbestigasyon.
Samtang, may pilang mga kritiko nga nagpabutyag it pagkabaeaka nga ro mga pag-amyenda hay pwede man nga magamit sa mga impeachment proceedings ag iba pa nga mga high-profile nga mga kaso sa paeaabuton.
