KALIBO, Aklan—Maga-arangkada eon hin-aga nga adlaw it Biyernes, Abril 28 ro tatlong adlaw nga event nga nakasentro sa environmental protection and preservation ag health and wellness sa ginbansagan nga “Love Boracay” nga magabuhay hasta sa Mayo 1, 2023.
Ro Love Boracay hay gin umpisahan ko 2019 it Boracay Inter-Agency Task Force kaibahan ro Boracay stakeholders bilang kabaylo sa LaBoracay nga nakilaea dahil sangka pakaaga nga beach parties nga nagahakot it libu-libong mga turista.
Suno kay Malay Tourism Officer Felix delos Santos ro Love Boracay hay serye it mga aktibidad angot sa pagdumaea it palibot nga nagatuyo nga mabalanse ro pag-umwad it turismo ag pag-preserba sa kaanyag it isla.
Pila sa mga nakaplastar nga aktibidad hay ro Pinta Layag Festival sa frontbeach; Ati-Atihan Festival, Project Prestine, sangka clean-up drive sa coastal ag underwater nga paga intrahan it nagkaeain-eain nga frontliners association nga pagasundan it parade of sea and aqua sports assets ag open dance contest.
Sa Abril 29, makaangkon it sangka family fun run for mental wellness nga pagapangunahan it Miss Universe 1999 1st runner-up Mirriam Quiambao ag pagkatapos hay ro pagpatigayon it beach sports kapareho it soccer, volleyball ag frisbee.
Makaangkon man it music and arts festival nga pagasundan it summer night party.
Sa Abril 30, nakataeana ro bike race.
Magapatigayon man it Hurma Baeas competition agud nga mai-showcase ro sand castle nga sambilog sa mga atraksyon sa Boracay ag ro Crystal Kayak Photo competition.
Umpisa makaron nga 2023, ro LGU-Malay eon ro magadumaea it Love Boracay.
Dugang pa ni delos santos nga magadere-deretso ro iba pang aktibidad angot sa Love Boracay sa Fiesta de Obrero, ro kapistahan it banwa it Malay.
