KALIBO, Aklan — Gin-umpisahan eon it Land Transportation Office (LTO)-Aklan ro sticker tagging ukon pagbutang it sticker sa tanan nga mga saeakyan sa Isla it Boracay.
Suno kay LTO-Aklan acting chief Engr. Marlon Villes, tinutuyo it sticker tagging nga ma-imbentaryo ag madali nga matumod ro mga lehitimong saeakyan sa sueod it isla.
Ro mga saeakyang may sticker hay nagakahueogan nga kompleto ag bukon it expired ro mga dokumento kaibahan ro driver kara.
Target it ahensiya nga boe-on ro tanan nga mga kolorum sa Boracay.
Base sa record it Malay Transportation Office (MTO), kapin sa 5,000 eon ro saeakyan sa sueod it isla kabangdanan it pag gutok ku daeagan it trapiko.
Sa makaron hay ginbuoe eon ro mga saeakyan nga naga gamit it diesel ag gasolina ag ginbayluhan it mga electronic tricycle ukon e-trike.
Igabawae man ro mga truck sa lugar.
