BALITANG Espesyal —- Sangka misteryosong “sawa” ro nadiskubre it sangka pamilya sa Sakhon Nakhon, Thailand ro gina-istoryahan makaron bangud sa kakaiba ag mabalahibong itsura kara.
Nagapauli sa anang trabaho ro 49 anyos nga si Tu kat makita nana nga naga-eangoy sa sangka sapa ro sangka kulay berde ag mabalahibong sawa!
Sa sobrang pagkangawa kon ano ro nakita, gindakop nana ag ginbutang sa sangka garapon nga may tubi.
Kat ginpakita nana raya sa anang pamilya, owa it maskin sambilog kanda ro makahambae kon anong klaseng sapat.
Ginhana nanda raya nga pakaunon ag nagustuhan kara ro mga maintok nga isda nga andang ginbutang.
Sa kagustuhan nga masayuran kon anong klaseng sapat raya, ginboe-an nanda it video ro sawa agud nga i-post online ag magpangutana sa mga social media websites.
Naging viral ro video sa Thai netizens ag maabu ro nagkumpara kara sa sangka dragon.
Naka-abot ro video kay Sam Chatfield, sangka snake species coordinator sa Wildlife ARC.
Ro Wildlife ARC hay sangka organisasyon nga naga-rescue it mga injured animals.
Suno kay Sam, ro misteryosong sawa hay posibleng sangka puff-faced water snake nga gintubuan it eumot ukon algae sa kaliskis.
Sa makaron hay nakikipag-coordinate ro pamilya ni Tu sa andang local animal welfare group agud nga i-turn over ro mabalahibong sawa agud nga maestudyuhan kon ano ro eksaktong specie kara.
