KALIBO, Aklan—Mabudlay pa nga ma-predict kon sin-o ro magadaog sa paeaabuton nga eleksyon sa Estados Unidos sa maabot nga Nobyembre 3.
Suno kay Joel Damarillo Sebag, kilaeang pianista ag conductor sa Arkansas (Arkanso), USA nga masyadong close fight ro engkwentruhanay sa tunga ni US president Donald Trump ag Democratic presidential nominee Joe Biden sa nasambit nga estado.
Ginpahayag dugang nga naging gobernador it Arkansas (Arkanso) si dating US president Bill Clinton nga kaalyado ni Biden, apang ro presenteng gobernador sa lugar hay sangka republican.
Gindugang pa ni Sebag nga ro resulta it botohan sa US hay owa nakadepende sa popular votes ukon boto it mga tawo kundi ana it electoral votes.
Ro andang estado sigon hay may 6 nga electoral votes sa Electoral College.
Sa haeos sang domingo nga nabilin antes ro eleksyon, masobra sa 60 million eon nga mga Amerikano ro nakaboto nga kaeabanan ro andang desisyon hay nakadepende sa andang binugtawan nga political ag religious beliefs.
Sa pihak kara, padayun gihapon ro kampanya it magtimbang nga kandidato agud nga makumbinsi ro mga owa pa nakaboto.
Maabu sigon ro nagpatigayon it early voting sa US sa tunga it padayun nga paeag it coronavirus pandemic, kun sa siin pila sa mga raya hay “by mail” ukon nagpila sa mga polling precinct antes ro election day sa November.
Pitong kandidato sa pagka-pangueo ro kaibahan sa official ballot kaibahan ro singer/rapper nga si Kanye West , apang ro ginatutukan eamang hay sanday Trump ag Biden.
Si Mr. Sebag hay kapin sa 24 anyos eon nga naga-istar sa US.
