Gindemanda it mag-asawang senior citizen sa Bad Salzuflen, Western Germany ro andang kaeapitbaeay bangud sa gina alegar nga 200 beses nga pagtuktura-ok sa sueod it sang adlaw it andang alagang manok.
Suno sa mag-asawang Friedrich-Wilhelm ag Jutta nga indi sanda maka-angkon it malinong nga adlaw sa andang baeay.
Kaeabanan sigon nga naga-umpisa ro pagpanukturu-ok alas-8:00 it agahon ag owa eon naga-untat hasta sa hapon.
Suno kay Friedrich-Wilhelm, daywa eang nga butang ro mahimo nga matabo, agwantahon nanda ro kasangag it agak ukon mapasaka sanda it kaso.
Ginpahayag dugang nga indi man sanda maka agto sa andang garden ag indi man nanda mabuksan ro andag bintana bangud sa indi maagwantahan nga kasangag.
Suno pa sa asawa kara nga si Jutta nga makabig raya nga torture para kanda.
Ginpahayag it abogado it mag-asawa nga ro hyper-active nga manok ro owa nagakabagay nga alagaan sa sangka malinong nga housing estate ag sa kamatuoran, ro sambilog pa nanda nga kaeapitbaeay hay naghalin sa andang lugar may daywang dag-on eon ro nagtaliwan bangud sa owa it pundo nga pagpanukturu-ok it manok.
Bangud kara, gin-record it mag-asawa ro pagpanukturu-ok it manok agud nga mangin ebidensya sa korte ag naga-claim nga ro legal action ro naga-isaeahanon nga option matapos nga owa gid nagpamati ro nagapanag-iya it manok.
Nagpanindugan man ro tag-ana it manok nga si Michael D., may mabahoe nga papel ro sapat bangud nga raya ro naga-maintain it order sa iba pa nga mga kaibahan nga manok.
Nakataeana ro hearing sa Lemgo District Court.
