NATIONAL News — Nagpromisa ro Malakanyang nga magasunod sa magiging mandu nga igapapanaog it Korte Suprema angot sa Philippine Health Insurance Corporation (PhilHealth) budget.
Raya ro ginpahayag ni Palace Press Officer Undersecretary Atty. Claire Castro.
Sa report, ginpahayag ni Supreme Court Associate Justice Antonio Kho. Jr. nga tiempo eon agud nga i-overhaul ro Philippine Health Insurance Corporation (PhilHealth) kaibahan ro pagbaylo it board kara sa tunga it kapas-eawan nga magsunod sa gina-mandato it laye angot sa paggamit it pondo kara.
Ginhimo it mahistrado ro pahayag sa ikatlong round it oral argument sa mga petisyon nga m nagakuwestiyon sa konstitusyonalidad it PhilHealth fund transfer sa national treasury ko Martes.
Ginkuwestiyon kara ni Kho kun paalin nga gin-obra it PhilHealth ro andang budget request sa General Appropriations Act (GAA) nga dapat magahalin sigon sa mga koleksyon it buwis, kaibahan ro halin sa sin taxes ag gaming revenues, sandig sa nakabaebag sa laye.
Gin-aku ni Department of Health (DOH) Spokesperson Assistant Secretary Albert Domingo nga gina-compute it PhilHealth ro andang budget request base sa numero it mga indirect members sa andang database ag owa nagbase sa computation sa sin tax allocation.
Bangud kara, ginkuwestiyon ni Kho ro PhilHealth kun ginabalewala kara ro andang mga legal funding sources nga ginsabat man ni Domingo nga ro mga gina-una eamang sa prinsipiyo it pag-budget it PhilHealth ro mga kinahangeanon nga nakabase sa alokasyon sa baylo nga magsalig eamang sa mga ginaeauman nga kita it gobyerno.
Ginrason man ni Kho nga ro self-imposed funding limits it PhilHelath hay nagpugong sa state insurer nga eubus nga masabat ro healthcare needs it mga Pilipino.
Samtang, gin-engganyo man ni Associate Justice Kho ro PhilHealth nga hinyuon kay Pangueong Ferdinand R. Marcos, Jr. nga ibalik ro P60 billion nga pondo it PhilHealth nga ginsaylo sa national treasury bilang unprogrammed funds.
Ginpamilit it mahistrado nga dapat gamiton ro nasambit nga mga pondo agud nga mapaeapad pa ro mga benepisyo it PhilHealth, mapamayad ro mga serbisyo, ag magbo-oe it dugang nga mga tawuhan agud nga masabat ro mga kinahangeanon sa healthcare it atong nasyon.
Nakataeana nga pagahiwaton ro masunod nga hearing sa Abril 29 kadungan it ginaeauman nga pagdesisyon it SC sa magiging kapalaran it kontrobersiyal nga PhilHealth fund transfer.
