KALIBO, Aklan–Aminado ro Malay Tourism Office nga nakaangkon it pag-eabag sa carrying capacity sa Isla it Boracay ko Semana Santa eabi eon ko Abril 14 Huwebesa Santo ag Abril 15 Biyernes Santo.
Suno kay Malay Chief Tourism Operations Officer Felix delos Santos, kinahangean sigon nga talakayon it provincial government, Department of Interior and Local Government (DILG) ag Department of Environment and Natural Resources (DENR) ro pagahimuon nga sistema.
Ginpamilit kara nga ro ginarekomendang daily threshold para sa Boracay hay 19,215 eamang, apang ro tourist arrivals ko Abril 14 hay nag-abot sa 21,252 samtang ko Abril 15 hay 22,519.
Nasayuran nga gintaeana ro carrying capacity sa isla agud nga maprotektahan ro palibot ag water quality.
Ko 2018, ginmandu ni Pangueong Duterte ro temporaryong pagpasarado sa Boracay sa sueod it an-um nga buean agud nga taw-an it daean ro paglimpyo ag rehabilitasyon.
Sa pihak nga parte, umpisa Abril 1 hasta 17, nagsala eon sa 100,945 ro tourist arrivals sa isla, pinakamataas ko Holy Week nga umabot sa 44,981.
