KALIBO, Aklan—Ginsuhestiyon ni Kalibo Sangguniang Bayan Ex-officio member ag Pook Punong barangay Ronald Marte nga makaangkon it public hearing agud nga matalakay ro isyu angot sa pagbalik sa dating pamasahe sa mga pampasaherong tricycle sa banwa it Kalibo.
Nagapati imaw bilang sambilog sa mga miyembro it committee on transportation nga kon ginpasugtan eon it Provincial Inter-Agency Task Force ro ap-at nga pasahero sa kada tricycle hay nagakabagay man nga panabaan ro pamasahe sa napueong piso halin sa presenteng ginasukot nga 15 pesos eabi eon iya sa barangay Poblacion.
Gindugang pa ni Marte nga pila sa mga driver nga naga biyahe sa mga barangay hay nakapatigayon eon it hinun-anon rason nga nakapanaba eon sanda it limang piso nga pamasahe.
Makabig man sigon nga pag-eabag sa naga-eksister nga laye ro presenteng panueuktan bangud nga owa raya nagakasinanto sa taripa nga aprubado it LGU-Kalibo.
Samtang, ginaduso man nana makaron sa andang chairman nga magpatawag it committee hearing agud nga maresolba ro nasambit nga isyu.
