Maskin nga owa pa natapos ro pandemya tuga it COVID-19, may panibag-ong paeag eon man sa atong ikamayad nga eawas.
Padayun ro pagkalhit it virus nga Monkeypox sa nagkaeain-eain nga nasyon.
Angot kara, ginpabaskog pa it Pilipinas ro border control measures.
Ginmanduan eon ro Bureau of Quarantine nga pabaskugon ro pagbantay sa mga pasaherong nagahalin sa mga nasyong may kilaeang kaso it Monkeypox.
Ginpataas eon man ro symptom screening para sa mga magasueod nga pasahero mag-eowas sa iba pang mga control measures.
Sa pihak nga nauna eon nga gin-anunsyo it Department of Health nga owa it nakitang kaso it Monkeypox virus sa Pilipinas kasunod it mga kasong nakit-an sa mga nasyon sa Europa, United States, Canada, ag United Kingdom, kinahangean sa gihapon nga mag doble dahan.
Suno sa World Health Organization, ro Monkeypox hay sangka viral disease nga nagahalin sa mga sapat ag nagapangunang nagakatabu sa mga tropikal nga rainforest nga lugar it Central ag West Africa.
Rason nga pinaagi sa pagbantay sa mga border, nagaeaum kita nga indi maka-eusot ro virus ag eabaw sa tanan, kabay nga magpundo eon ro pagkalhit kara.
Handum naton nga eubusan eon nga makaguwa sa mga sakit nga nagapabudlay bukon eamang sa ikamayad nga eawas kundi maging sa pangabuhian.
Ro atong ginaeauman makaron hay eubusan nga makontrol ro sitwasyon.
Sa pagbueuligan it gobyerno, pribadong sektor ag mga pumueuyu, maeampasan naton ro pandemya ag iba pang krisis.
