KALIBO, Aklan—Mas sangkiri ro casualty sa Houston, Texas kumpara sa ibang mga estado it Amerika sa nagapadayun nga protesta angot sa pagkamatay it African-American nga si George Floyd samtang sa kustodiya it pulisya.
Suno kay Bombo International Correspondent Diona Prado Ibardolasa, tubong Brgy. Pagsanjan, Banga, Aklan ag presenteng naga-istar sa Houston, Texas nga maskin imaw hay na-trap kahapon matapos nga ginbaeabagan ro mga nagapanguna nga highway paagto sa downtown area.
Kapin sa 100 sigon nga katawo ro gin-aresto bangud sa nagkaeain-eain nga saea.
Naging matawhay man suno kana ro mga ginapatigayon nga protesta bangud sa sangkaterbang pulis nga nakakalhit.
Ko adlaw it Biyernes sigon nag-umpisa sa Houston ro mga demonstrasyon nga nagpadayun hasta makaron.
Pilang pulis suno kana ro naninahan ag maabu nga mga police patrol ro nasamad.
Ginpahayag pa ni Ibardolasa nga maskin nga owa pa natabu ro pagkamatay ni Floyd hay eapnaag eon ro racism ag police brutality sa US partikular sa mga itom nga amerikano.
Nasayuran nga nagtuhaw ro mga demonstrasyon ag riots sa nagkaeain-eain nga siyudad it US matapos nga maging viral ro video ni George Floyd, 46 anyos matapos nga maeuk-an kat gindaganan it tuhod it sangka pulis ro anang leog sa Minneapolis ko Mayo 25.
Ginaeauman pa ni Ibardolasa nga mas pang maga-abu ro mga tawo sa karsadahon sa oras nga iga-uli ag iga-eubong ro eawas ni Floyd sa lugar nga ginbahuean sa Houston.
Samtang, ginbatikos man kara si US president Donald trump bangud nga imbes sigon nga pakalmahon ro mga demonstrador hay mas pang ginagatungan kara ro andang kaakig.
Sa idaeum suno kana it Trump administration hay mas pang nag grabe ro racism sa Amerika.
