KALIBO, Aklan—Kabilugan nga 618 kilos nga pork meat products ro nadisposed it Department of Agriculture’s Bureau of Animal Industry Veterinary Quarantine Services, Provincial Veterinary Office, Bureau of Customs, Municipal Agriculture and Fishery Council ag municipal government it Kalibo halin ko buean it Hunyo hasta makaron nga Hulyo matapos nga makumpiska ro mga raya sa Kalibo International Airport (KIA).
Raya hay kasunod it pagbawae it gobyerno nga makasueod sa nasyon ro mga agricultural goods ag meat products kaparehas it canned pork and meat, frozen and cooked meat, assorted chicken, processed pork and beef, ag assorted dried meat maghalin sa nasyon nga ginapatihan nga apektado it makamaeatay nga African Swine Fever (ASF) virus.
May kaangtanan kara, ginabawaean ro mga turista halin it China, Korea, Taiwan, Singapore, Malaysia, Macau ag Hong Kong nga magpasueod sa nasyon it anumang produkto agud nga malikawan nga matapnan ro agricultural product it Pilipinas.
Nagapadayon ro hugot nga monitong it Bureau of Customs sa mga paeoparan partikular sa KIA bangud ro mga nasambitang turista hay nakasanayan eon nga magdaea ukon magbaeon it andang kaugalingon pagkaon paadto sa isla it Boracay kon siin ro mga raya nagabakasyon.
Una kara, ko nagtaliwan nga Hulyo 23, kapin sa 242.5 kilos it nasambitang produkto ro ginsunog it mga awtoridad matapos nga nakumpiska ro mga raya sa paeoparan.
Samtang ko Hulyo 9 hay 151.9 kilos it processed meat products ro gindisposed sa sanitary landfill ag 223.95 kilos man ro unang nadisposed ko buean it Hunyo.
Nasayuran nga gin-ban it gobyerno ro importation it pork meat sa nasyon it Poland, Ukraine, Vietnam, South Africa, Mongolia, Zambia, Romania, Latvia, Belgium, Bulgaria, Moldova, Czech Republic, Cambodia, Hungary ag Russia nga ginapatihan nga apektado it ASF virus.
