KALIBO, Aklan — Sa kritikal nga kondisyon ro sangka babaye matapos nga inapok halin sa anang ginasakyan nga pribadong tricycle ag pagkatapos hay nasagasaan pa it nag-agi nga kotse sa kahabaon it national highway nga sakop it Brgy. Linabuan Norte, Kalibo, gabi-i it Miyerkules, Enero 1, 2025.
Nag-angkon it lastro sa ueo ag iba pang parte it eawas ro biktima nga sakay it tricycle nga ginamaneho it anang asawa.
Presente raya nga gina-obserbahan sa Intensive Care Unit (ICU) it Aklan Provincial Hospital.
Base sa report, samtang nagapa-uli sa andang baeay halin sa Brgy. Mobo, Kalibo hay aksidenteng bumunggo ro tricycle sa nakaparadang pick-up nga saeakyan rason nga inapok ro biktima sa karsada ag nasagasaan pa ro anang eawas it nag-agi nga saeakyan.
Samtang, una eon sa mayad nga kahimtangan ro driver it tricycle nga nag-angkon it nina sa anang siki.
Sa makaron hay nagapadayun ro imbestigasyon it Kalibo Municipal Police Station sa nasambit nga insidente.
