KALIBO, Aklan—Gintaw-an it importansya it Municipal Disaster Risk Reduction and Management Office (MDRRMO)-Kalibo ro pag-adopt sa presenteng nae-eksperyensyahan nga climate change sa nasyon ag bilog nga kalibutan.
Raya ro ginpunto ni Terence Toriano, Head it MDRRMO-Kalibo kadungan it selebrasyon it National Disaster Resilience Month.
Suno kana, dapat maging haum ro tanan sa maga-abot nga kalamidad agud nga malikawan ro grabeng kahalitan sa propiedad ag pagkaduea it kabuhi.
Importante sigon nga magtaeana ro kada pamilya it disaster kit bangud makabulig raya sa oras it kalamidad ag emerhensiya.
Agud nga raya hay mataw-an it katumanan, kinahang-ean ro hugut nga koordinasyon ag kooperasyon it bilog nga komunidad sa mga natungdan nga ahensya it gobyerno.
Nasayuran nga masami eon ro pagbaha ag pagkarumpag it eugta sa nagkaeain-eain nga lugar sa nasyon kada naga-uean.
