Paga-umpisahan it Brgy. Andagao, Kalibo ro andang pagpatigayon it Measles-Rubella Supplemental Immunization Activity (MRSIA) hinaga nga adlaw it Lunes, Agosto 10.
Suno kay Aubrey Melanio, SK chairman it nasmabit nga brgy., haom eon ro pagpatigayon it nasambit nga programa kun sa siin may kabilugan sandang 645 ka mga inunga edad 6months hasta 59 months it andang barangay ro maka-partisipar sa nasambit nga programa.
Daywang adlaw nga igapatigayon ro vaccination kun sa siin gin-tunga nanda sa kada sitio ro pagahiwatan kara para nga ma-asikaso it maayos ro mga inunga.
Dugang pa nana, sa sueod it daywang adlaw, separado nga iga-cater ro kabilugan nga 10 ka sitio it nasambit nga barangay.
Ginpasigurado ni Melanio nga ro pagbakuna hay euwas para sa mga inunga bangud nga maga-patigayon man it screening antes mag-tao an it bakuna para kaeuwasan it mga inunga.
Padumdum man nana nga antes ro pag-bakuna, siguraduhon nga uwa it masakit nga nababatyagan ag indi mag-himo it mga bagay nga posibleng tunaan it masakit.
Ro Measles-Rubella Supplemental Immunization Activity hay ginlunsar it Department of Health (DOH) para nga mabuligan ro mga inunga nga kontrahon ro masakit nga tigdas.
