Temporaryong nakahilway ro mga akusado sa kasong pag-eabag sa Presidential Decree 705 ukon Forestry Act sa Malay Municipal Police Station matapos nga nakaimponer sanda it pyansa sa korte.
Suno kay P/Lt.Col. Don Dicksie De Dios, hepe it Malay PNP station nga sunod-sunod nandang naaresto ro 16 ka mga akusado nga mga residente it Mt. Luho sa isla it Boracay pinaagi man sa warrant of arrest nga ginpaguwa it korte.
Ginpahayag dugang ni PLt.Col De Dios nga gin-umpisahan ro andang operasyon ko katapusan it Agosto hasta ko Setyembre 16.
Ro nasambit nga mga indibidwal hay ginkasuhan it National Bureau of Investigation ukon NBI sa kasagsagan it rehabilitation it isla ko dag-on 2018.
Sa makaron suno kay PLt.Col. De Dios hay nagapadayon ro andang intensified campaign kontra sa mga wanted person para masikop ro mga raya ag mapaatubang sa korte nga natungdan para sa nagakaigong disposisyon.
