NATIONAL News — Eampas eon sa ap-at nga milyon ro naproseso it Commission on Election nga mga aplikasyon it mga botante.
Raya ro ginpahayag ni Comelec Chairman George Garcia.
Sa datos nga ginpaguwa ni Garcia, may kabilugan eon nga 4,057,001 nga aplikasyon ro naiproseso.
Pinakamaabung nagparehistro ro mga babaye nga una sa 2,093,011 kumpara sa mga eaeaki nga naga-abot eamang sa 1,963,990.
Sa kabilugan, ro Region IV-A ukon CALABARZON ro may pinakamaabung numero it naprosesong aplikasyon nga may 696,555, ginsundan it National Capital Region nga may 561,714 ag Region III ukon Central Luzon nga may 477,016.
Samtang, mag-eowas sa Cordillera Autonomous Region, tanan nga rehiyon hay nakalista it six-digit volume it naprosesong aplikasyon.
Sa Region VI, nakalista it 226,227. Magabuhay hasta sa Setyembre 30, 2024 ro voter registration program it Comelec angot sa May 12, 2025 elections.
Ro midterm national ag local elections sa masunod nga dag-on hay may kabilugan nga 18,271 nga posisyon.
Kaibahan kara ro 12 nga puwesto para sa Senado, 63 party-list representatives, 254 district congressional seats, ag 11,948 Sangguniang Bayan members.
