KALIBO, AKLAN — Eubus ro naging pagpasaeamat it mga benepisyaryo iya sa probinsiya it Aklan sa nabaton nga ayudang bugas halin sa gobyerno nga mismong si Pangueong Ferdinand Marcos Jr., ro nagpanguna sa distribusyon makaron nga hapon sa ABL Sports and Cultural Complex.
Kapin sa 1,000 nga pamilya ro nakabaton it sangka sakong bugas nga 25 kilos nga puro benepisyaryo it Pantawid Pamilyang Pilipino Program ukon 4Ps.
Antes ro distribution hay nakaangkon it registration.
Nasayuran nga ro mga ginpanupod nga bugas hay halin sa 42,180 ka mga sako it bugas nga nakumpiska it Bureau of Customs sa ginpatigayon nga inspeksyon sa sangka warehouse sa Brgy. San Jose Gusu, Zamboanga City kan-o eamang kun sa siin owa raya it nagakaigo nga dokumento agud nga maibaligya.
Nagabalor raya it kapin sa 42 billion pesos.]
Ro mga smuggled Alas Jasmine Fragrant Rice nga 25 kilos kada sako hay gindesisyunan it gobyerno nga ipanao sa mga indigent families sa nagkaeain-eain nga na-identify nga mga banwa , siyudad ukon probinsiya bilang dugang nga bulig.
Sa pihak nga parte, nagpanupod man si marcos it mga gamit sa pangisda ag makinarya sa pagpananum nga ginpatigayon sa Tangalan Sports and Cultural Center.
Sa pihak nga parte, sa anang diskurso, ginpamilit ni Pangueong Marcos nga prayoridad it administrasyon nga matutukan ro agrikultura eabi eon ro pagbulig sa mga mangunguma ag rice retailers.
Ginpaabot man ni Aklan Governor Joen Miraflores ro pagpasaeamat sa gintau nga bulig sa mga residente ag sa suporta sa mga mangunguma.
Ginpasiguro pa kara nga magapadayun ro distribusyon it bugas kadungan ro pagpasiguro it DSWD nga mataw-an man ro iba pang 4ps beneficiaries sa iba pang mga lugar sa nasyon.
Samtang, gintaw-an man it DSWD ro daywang organisasyon sa Aklan it seed fund nga nagabalor it kabilugan nga 600,000 pesos bilang paumpisa nga capital sa sustainable livelihood program association nga gin organisa it ahensiya.
Sambilog sa nataw-an kara hay ro sangka grupo it TODA sa Kalibo ag organisasyon nga naga-negosyo it agricultural supply sa banwa it Nabas.
Nasayuran nga idtu anay unang nag agto si marcos sa probinsiya it Antique sa San Jose de Buenavista para sa kaparehong aktibidad antes nga nagderetso sa Roxas City, Capiz ag pagkatapos hay iya sa banwa it Kalibo.
Ginasugid nga mismong si Pangueong Marcos ro nagtumod it mga probinsiya sa Western Visayas nga anang pagataw-an it bugas.
