KALIBO,Aklan — Nagpatigayon it break sa isla it Boracay ro mga obispo, kaparian, cardinals ag ro Apostolic Nuncio to the Philippines, His Excellency Most Reverend Charles Brown.
Raya hay matapos ro andang dag-unan nga retreat nga ginpatigayon sa Marzon Hotel sa Cardinal Sin Avenue sa banwa it Kalibo.
Suno kay Rev. Fr. Tudd Belandres, kora paroko it St. John the Baptist Cathedral nga nagpataliwan it sang gabie sa Boracay ro nasambit nga mga bisita bago umpisahan ro ika-126th plenary assembly it Catholic Bishops Conference of the Philippines (CBCP) nga maga-umpisa hin-aga nga adlaw it Sabado hasta sa Hulyo 10, Lunes nga adlaw.
Una kara, ginpangunahan it Papal Nuncio ro misa kahapon it agahon bilang kaparte man sa pagtapos it andang retreat antes ro mga raya nagtabok it isla.
Samtang sa adlaw it Sabado hay pagapangunahan ni His Eminence Jose F. Cardinal Advincula it Archbishop of Manila ro misa sa Kalibo Cathedral.
Ginakabig nga tumaeagsahon nga kahigayunan nga napilian ro Diocese of Kalibo nga maging host it nasambit nga event.
Haeos tanan nga aktibong obispo sa Pilipinas hay nag-atendir it retreat.
Nasayuran nga ro CBCP plenary assembly hay sangka twice-a-year meeting kon sa siin, magasentro ro asembleya sa pastoral matters kaeakip eon ro agenda sa moral, doctrinal ag social issues.
