Umani it batikos ro pilang babaying cosplayer sa sangka anime convention sa Guangzhou, China matapos magbaligya it ilimnon nga gina-alegar nga halin sa tubi ag softdrinks nga ginbabaran it andang mga siki.
Natabu ro insidente sa Firefly Comic Convention nga ginpatigayon umpisa Hulyo 17 hasta 20 sa Guangdong province. Sa mga nagkalhit nga litrato ag video sa social media, makitang ginabaligya ro ginatawag nga “feet juice” sa balor nga 50 yuan ukon masobra sa ₱400 kada baso. Suno sa mga report, maabung eaeaki ro nag-pila agud nga magbakae ag samitan ro nasambit nga ilimnon.
Maskin nga may nakapaskil nga padumdum nga ro aktibidad hay ginhimo eamang bilang libangan ag bukon it agud nga kumbinyuhon ro bukon it mayad nga hilimuon, umani gihapon raya it grabeng reaksiyon halin sa mga netizen nga nagtawag kara nga mahigku ag owa nagakabagay sa sangka pampublikong pagtililipon.
Suno pa sa mga report, gintuead it mga cosplayer ro sangka kapareho nga gimik nga ginpatigayon sa FanimeCon sa San Jose, California ko Mayo. Bangud sa mga reklamong nabaton, ginpahalin it mga organizer it Firefly Comic Convention ro mga eakot nga cosplayer ag nagpromisa nga indi eon pagapasugtan sanda sa mga masunod nga event ag ro mga aktibidad nga ginakabig nga bastos ukon owa nagakabagay.
