KALIBO, Aklan—Ginapadumdum it Civil Service Commission ro mga empleyado it gobyerno nga indi makisawsaw sa mga isyung pangpulitika angot sa nagahilapit nga eleksyon sa Mayo 12.
Suno kay Ferdinand Macogue, OIC chief it human resource specialist it CSC Aklan nga raya hay nakabaehag sa joint commission on elections ukon Comelec CSC advisory on electioneering and partisan political activities joint circular no 1 series of 2016 nga ro tanan nga mga empleyado it gobyerno hay bawae nga magbilog it grupo, asosasyon ukon komite agud nga mag solicit it boto ukon magpangampanya pabor ukon kontra sa sangka kandidato.
Bawae man ro magpatigayon it mga political rallies, caucuses, pagpueong ukon parada para sa election campaigning , mag obra it mga diskurso , anunsyo ukon media commentaries para suportahan ukon kontrahon ro sangka kandidato.
Kamana man ro pag publish ukon pagpanupod it campaign materials ag pagsuksok it anumang eambong nga pangkampanya.
Posible sigon nga masuspendi it sang buean hasta an-um nga buean ag mapahalin sa trabaho ro sin-o man nga pauman uman nga maga eabag sa nasambit nga patakaran.
