Naeampasan it Bureau of Customs (BOC) ro andang revenue target para sa unang quarter it dag-on 2026 matapos makalista it ₱239.054 bilyong pondo nga nagsueod sa kaban it banwa halin Enero hasta it Marso.
Suno kay BOC Commissioner Ariel F. Nepomuceno, masobra pa raya sa ₱2.994 bilyon ukon 1.3 porsyento kumpara sa andang orihinal nga asinta nga ₱236.060 bilyon.
Mas mataas man ro nakolekta makaron it ₱7.677 bilyon ukon 3.3 porsyento kon ikumpara sa kaparehong tyempo ko nagtaliwan nga dag-on.
Raya eon ro nailistang pinakamataas nga first-quarter collection sa kasaysayan it ahensya.
Ginbida it opisyal nga ro sobrang kita hay direktang resulta it mga ginapatuman nga reporma, hugot nga pagdumaea ag mas ginpabaskog nga pagpatuman it laye sa tanan nga pantalan sa nasyon.
Mabahoe nga parte sigon it nagsueod nga pondo hay naghalin sa madinaeag-on nga public auction it mga ginkumpiskang kargamento ag kontrabando, partikular eon ro mga smuggled luxury vehicles.
Mag-eowas kara, mabahoe man ro naibulig it ginpabaskog nga post-clearance audit operations it ahensya agud sukton ro mga kakueangan sa buwis it mga importer.
Bilang kaparte it paglimpyo sa ahensya, padayon nga ginapatuman it BOC ro andang Integrity, Accountability, and Modernization Program.
Ro nasambit nga tikang hay nagatuyo nga iduso ro transparency ag i-angat ro professionalism sa linyada it mga miyembro agud mapunggan ro anomalya.
Ginpunto ni Nepomuceno nga ro pag-eampas sa andang target hay sangka klarong pamatuod nga epektibo ro pagtingob it tampad nga sistema, integridad, ag modernisasyon agud daeayon nga mapabaskog ro ikasarang it gobyerno nga makatipon it pondo.
