KALIBO, Aklan—Mabahoe ro pagpasaeamat it mga grand draw winners it Enhanced Swerte sa Palengke, balde-baldeng papremyo na, may cash-siyahan pa matapos nga mabaton ro andang natungdan nga premyo sa ginpatigayon nga simpleng awarding ceremony sa broadcast center it Bombo Radyo Kalibo.
Pinakamaswerte sa tanan si Anita Rola it J. Magno St. Kalibo nga nagbaton it 20 mil pesos cash bilang first prize.
Plano nana sa nadag-an nga premyo nga ibayad sa anang mga baeayran nga may due date eon ag pagbakae it dugang nga proof of purchase agud nga makapasakop sa nagapadayun nga 1-2 panalo part 20 promo.
Napasaalima man it second prize winner nga si Erlinda Cual it Linabuan Norte, Kalibo ro anang nadag-an nga 10 mil pesos cash; kamana man ro 3rd prize winner nga si Fatima Legaspi it Andagao, Kalibo nga nagbaton it 5,000 pesos nga cash .
Samtang, eubus man ro kalipay it lima ka mga consolation prize winners matapos nga mabaton ro tig-dos mil pesos nga cash.
Raya hay ginaeakipan nanday Rosemarie Mationg it Poblacion, Altavas, Remegio Zaulda it Purok 2, C Laserna St., Kalibo, Fred Barrientos it Linayasan, Altavas, Lucy Rebutala it Polo, Banga ag Julita Villas it Oyo Torong St., Kalibo.
Kadungan kara, gin-imbitahan nanda ro iba pa nga mga tagpaeamati nga magpasakop man sa mga masunod pa nga promo agud makadaog man kapareho nanda.
