KALIBO, Aklan—Dagsa eon ro mga nagabakae it mga kakanin makaron nga adlaw it fiesta minatay.
Suno kay Sharlyn Itulid, sambilog sa mga sikat nga nagabaligya it kakanin sa Aklan nga antes pa man ro November 1 hay maabu eon ro naga-order kanda ukon haeos full order eon sanda bukon eamang sa aklan kundi regionwide eon.
Mag-eowas sa mga naga-pick-up it andang order hay naga-deliver man sanda rason nga kaabuan kanda hay owa eon it haeos nga pahuway.
Naga-abot sa haeos 1,000 nga ka nigo sigon ro andang order makaron nga undas.
Pila sa mga madahog nanda nga produkto hay ro assorted kakanin nga ginaeakipan it sapin-sapin, biko kalamay, cassava pudding, puto-bigas, puto cheese ag iba pa.
Best seller sigon nanda nga baligya makaron ro halo-halo nga 4-combo nga kapareho it pichi-pichi, kutsinta, sapin-sapin ag biko.
Samtang, nagbukas sanda it walk-in nga bumaeakae bandang alas-3 hasta alas-4 it makaron makaron bangud nga priority nanda ro mga nagpa-reserve.
Gindugang pa ni Itulid nga kon igakumpara ro andang kita ko nagtaliwan nga dag-on , mas mabahoe ro andang kita makaron.
Nagaeaum man sanda nga mas pang maga-umwad ro andang negosyo maskin nga bukon it undas bangud nga ro pilang residente nga ginatamad nga mag-eaha it kakanin hay siguradong kanda magabakae.
Nasyauran nga kaeabanan sa mga pamilyang Pilipino ro nagapahaum it mga kananin kada undas eabi eon ro biko bangud sa pagpati nga nagabisita ro kaeag it mga nagtaliwan nga mahae sa kabuhi.
