Nagpatigayon it coastal cleanup ro mga kandidata it Miss Universe Philippines 2026 sa baybayon it Boracay, adlaw it Biyernes, Marso 20, bilang kaparte it andang community service activities.
Nagpamueot ro mga raya it basura sa sikat nga white long beach it isla.
Kaparte it dag-unan nga aktibidad it pageant halin ko 2023 ro pagbisita sa Boracay, kon sa siin ginpatigayon man ro outreach programs ag ro ginabantayan nga swimsuit competition.
Igapatigayon ro espesyal nga swimsuit show sa Aqua Boracay, Sabado it gabie.
Samtang, ro coronation night hay gintaeana sa Mall of Asia Arena sa Mayo 1, kon sa siin igapasa ni Ahtisa Manalo ro korona sa masunod nga reyna nga magarepresentar sa Pilipinas sa Miss Universe pageant sa Puerto Rico sa buean it Nobyembre.
Samtang sa pihak nga parte, nagaabot sa kabilugan nga 97,597 ro tourist arrival sa isla it Boracay sa unang daywang dominggo it buean it Marso.
Sa nasambit nga numero, 79,946 ro domestic tourist; 1,076 ro overseas Filipinos ag 16,575 ro foreign tourist.
